Þótti vænt um pistilinn sem myndlistarmaðurinn Jón Óskar skrifaði á facebook

"Móðir mín heitin á einkasýningu minni í NorrænaHúsinu 1993. 
Hélt 3 einkasýningar á árinu 2019

MYNDBYRTING ÞJÁNINGARINNAR SÍMsalurinn.
Einkasýning FORKOSTULEGT OG FAGURT GRAFÍKsalurinn/IPA Gallery. Sýningin var einnig 
hluti af Menningarnótt Reykjavíkur 2019
Var með stóran bás á Torg Listamessu sem var í raun einkasýning.
Tók þátt í 6 samsýningum hér og erlendis:
Nr. 3 Umhverfing á Snæfellsnesi.
Óvænt stefnumót, Listasafn Reykjanesbæjar.
22rd ECWS Exhibition Haapsalu vatnslitasýning, Eistlandi.
NORDIC CONNECTION Royal Watercolour Society of Wales.
Nordic Watercolour 2019 NAS, Tykö Masugn, Finnlandi
POP-UP LISTMARKAÐUR. Íslensk Grafík, Grafíksalurinn/IPA Gallery Reykjavík

Þrátt fyrir fjöldann á sýningunum þá hafði þetta ekkert að segja fyrir mig persónulega nema að ég er yfir mig skuldsett eins og ég hef verið allan minn feril sem myndlistarmaður.  

Því þótti mér vænt um pistilinn sem myndlistarmaðurinn Jón Óskar skrifaði og birti á facebook veggnum hjá sér en hann segir: "Ég rakst á mynd á netinu um daginn af verki eftir vinkonu mína Margréti Jónsdóttur listmálara. Ég er fullbrattur að kalla hana vinkonu en okkur kemur þokkalega saman, held ég, þá við hittumst. Myndin var af móður hennar, ef ég man rétt, fyrir framan verk eftir Möggu. Mögnuð ljósmynd Morgunblaðsins frá sýningu Margrétar á Kjarvalsstöðum. Ég hef aldrei skilið hvað hefur verið hljótt um Margréti í menningarumræðunni í gegnum árin. Hún er ekki listamaður sem rífur sig upp annað hvert ár og gerir myndir til að viðhalda starfsheiti. Hún hefur verið nonstop listamaður síðan ca 1975 ef ég man rétt, og ein af driffjöðrum að stofnum Suðurgötu 7 ásamt Eggerti, Ingólfi, Friðriki, Bjarna o.fl. Suðurgatan var stórmerkilegt fyrirbæri sem gladdi okkur öll sem vorum þá að byrja í þessum bransa. Ég hef séð sýningar Margrétar í gegnum árin og allar góðar. Ég hlýt að spyrja; af hverju hefur henni ekki verið hampað meir? Af hverju hafa söfnin hér heima ekki keypt meira af henni? Af hverju eiga ekki allavega 100 fjölskyldur verk eftir hana? Ég skil það ekki. Fyrir mer er hún stjarna og hefur alltaf verið.

Mér verður hugsað til Eyborgar Guðmundsdóttur og Guðmundu Andrésdóttur sem voru "hálfpartin" uppgötvaðar eftir dauða sinn. Þær fengu vissulega prik á sinni tíð en var alltaf haldið aftan við karla sinna kynslóða. Og þeir voru ekki par merkilegir margir hverjir. Ég skora á listáhugafólk og aðra vini að skoða Margréti sem má finna hér á Facebook. Annars er ég góður og vona að Einar Falur og Mogginn pönkist ekki í mér út af myndbirtingum. Tilfellið er, Mogginn er eina dagblaðið sem hefur fylgst með myndlistarsýningum og documenterað í gegnum tíðina."